Københavns Universitet

ONP: Dictionary of Old Norse Prose

Citation

2taka vb.DN VI (1358) 27837

ONP Reader

NRA dipl perg (1358)“Diplomatarium Norvegicum”

(Unger & Huitfeldt-Kaas 1864 [DN 6], 277-279¹⁹)

[e-n/e-t / e-m/e-u] [e-u / með e-u / við e-u] [til e-s] [um e-t / at e-u] [e-m/sér]

citation slip

278

bœta. vten þui at eins at med sua myklum niðin(g)skap ok illzsku verðe
gort at sealfum oss synizst engi vægð ne miskun a vera gerande, likar
oss ok vm giftinga maal. at su felagsgiærð stande sem þau gera siin a
millum er samanbindazst med guðs loghum ok manna. med logleghra
arfua sinna samþykt ok frendanna raaðe aðer en þau kommi saman. Eigi
skulu ok leighu men þuingaðer vera till heðan af vopn at eigha fyr
en þeir eighu till þriggia marka vm fram kleði siin. En þeir sem sua
mykit eighu skulu lidughir vera af vapna þinghs ferdom ef þeir hafua
vitni till at þeir sendu vopn siin till þingsens ok at þau ero loglegh.
En vm almenningga ok fiski votn vilium ver at þer hafuer eftir þui
sem fyr *hefuer þer haft ok nyt ok loghbok vattar. En vm vaghir allar
sem ganga skulu manna millum hafum ver þa skipan a gort at stein
skal standa aa Vllinshofue a Raumariki sa sem *þeir skulir retta ydra
pundara eftir ok annar j Aslo. er þeim skal suara. ok motader bader
at þer meghi(r) þui siðer j vaghinni verda prettader. þar ok sem morgh
sitzskini ero saman eftir foður eða moður þau sem huart mætte gera
fulla giærð saker fearluta sinna, þa skulu þau eighi þo gera meira en
æina giærð meðan þau ero oll saman þar till er þau skiliazst. Reið-
skiottr skal eingom fleirom gerazst en virduleghum herra fodur varom
ok oss herra biskupi ok sendeboðum þeim sem fara vaarra eða landz-
sens ærenda. eftir þui sem aat forno hefuir veret. sua at eighi gere
jæfnan hinir samu ok eighi fleiri sendeboðum en faðer vaar ok ver
skilium till j brefuom vaarom. venter oss at ver skulum sua þar till
sea. at almughanum verðe þat eighi miok till þynghsla. En vm æigna-
byggingar vilium ver at huer raðe sinni jorðu ok byggi eftir þui sem
han getr bæzst j værð komet ok huaratuæggia samsatter a verða hin
er jordena a. ok sa er læighir. Hafum ver ok gort yðer frealsa ok
lidugha. af ollum skyldauæitzslu gærðum syslumanna ok lensmanna. ok
ollum aðrum tilgiofum ok aloghum þeim sem þeir hafua a yder laght
vm riðir. firirbiodande þeim fulkomlegha þæss at beiðazst heðan af.
eða j nokorum lutt yder þui frammare at þuinga at ver hafum þessar
rettabœtr yder gefuet sua framt sem þeir vilia eigi missa þess starfs.
sem þeir hafua af vaarre haulfuu ok setta a ofuan varre sanre vbliðu.
Þar med firirbioðum ver ok at syslumen eða lensmen. lofue þeim mon-
num heima at sitia. sem till lagha verða loglegha stemfnder sua ok
at þeir take þa sækt sem oss hœyrir till. fyr en sa hefuir sin ret er
misgort er við ef han beiðizst ok vil siin rettyndi taka. Eigi vilium
ver ok at syslumen ok lensmen stæmfni bondum till loghmanz, vm sa-
karœyris vtheimtingar fyr en þat sem a er kiært er profuat ok ransa-
kat med vitnum ok skilriki heima j bygdalaghe þar sem malet gerdizst.