Københavns Universitet

ONP: Dictionary of Old Norse Prose

Citation

111

ok Audunar klærks Pals sunar at hœyra þann vithnisburð sæm þæir
skildu þa bæra. En af þui at þæir villdu æigi aftr koma þa let herra
biskup mæð godðra manna raðe þar bæra fyrst stæfnu vithni mæð
suarnum æiðum. Siðan giæk fram sira Andres fyr næmdr ok flutti sua
ok suor æftir at firir lidnum fimtighi vættra var han mæd virðulegum
herra Petre biskupi i Bergwin ok tok han þa saman alla tiund vm
Bergwin mæð sira Iware bolo vm þria vætr samfasta. Sagde hann
ok vndir æið sinn at sua luku þa þydiskir mænn tiund sina hæilagre
kirkiu þæir sæm vætrsætar varo sæm inlændsker ok næmde hann þæssa
þria af þæim, Hærman skullt i Einars garðe, Albrikt digra i Suæins
garðe ok Brun gamla aðr æn hann ætte nokkorn garð i Bergwin ok
æigi lankt þar æftir. Sagðe han ok at þa varo faer vætrsætar i Berg-
win, lagde han ok þat til æiðs sins at hann hafðe suaret þænna sama
vithnisburð aðr firir virðulegum herra Narwa mæð guds miskunn biskupi
i Bergwin mæð sira Erlingi at Mariu kirkiu. ok sira Guðifriði, hiauer-
andum herra Bassa Guðþorms syni er þa var syshlu maðr i Bergwin
Nikulase loghmanne ok marghum flæirum goðom mannum. En Guðifriðr
flutti sua ok suor æftir fullan bokar æið at hann var i hia ok hœyrði
at Arne Brynilldar sun i Einars garðe kiærðe firir virdulegum herra
Hakone kononge Hakonar syni at sira Þordr patten er þa song at
Petrs kirkiu i Bergwin villdi sætia vt af hæilagre kirkiu Herman skullt
gardz mann hans firir þat at hann næittade at gera hæilagre kirkiu retta
tiund. Suaraðe herra Hakon konongr til þæssa af þui at þu Arne byggir
hanum hus þin tolf manadr læighu sua sæm varom landz mannum ok
tækr af hanum ællding ok lysing ok slika lyðskylldu sæm adrum
garðz mannum þinum inlændskum þa vilium ver at han se i slikri
skylldu við guð ok hæilaga kirkiu vm tiundar giærð sina ok aðra lyð-
skylldu sæm varer landz mænn ero. Sua sagðe hann ok a æið sinn at
i Hnausanum var sa maðr er het Hæinrækr skulltr ok la han þa siukr.
En mæistare Suæin er þa song at Kross kirkiu villdi æigi olia han firir
þat at han næittaðe at gera retta tiund, bað Hæinrækr þa faður sira
Guðifriz luka halfa mork vægna mæistara Suæini i tiund firir sik ok
sua gerðe hann ok sidan tok hann oll sacramenta. Albrict digri het
ok æin þydiskr maðr er var i Suæins garðe, lauk hann ok sua sina
tiund sæm aðrer inlændsker mænn sua hit sama Brun gamle aðr langu
æn han ætte nokkorn gard i Bergwin, ok sua Hærmadr kolnare i Ængla
garðe sægir hann ok at þat myndi vera firir fim tighi vættra æða bætr,
þetta lagðe hann ok til æiðs sins at firir .viij. vættrom bar hann þænna
sama vithnis burð mæð suarnum æiði firir virðuleghum herra Narwa
biskupi i Bergwin mæð sira Erlingi pranda at Mariu kirkiu ok sira

'